Reis glorios, verais lums e clartatz,
Deus poderos, sehner si a vos platz,
Al meu companh siatz fixels ajuda,
Qu'eu non lo vi, pois la noitz fon venguda,
Et ades sera l'alba!
Bel compahno, si dormetz o veillatz?
Non dormatz plus, suau vos ressidatz,
Qu'en orien vei l'estela creguda,
Qu'amenal jorn, qu'eu l'ai ben coneguda,
Et ades sera l'alba!
Bel dos companh, tan soi en ric sojorn,
Qu'eu no volgra mais fos alba ni jorn,
Car la gensor que anc nasques de maire,
Tenc e abras, per qu'eu non prezi gaire,
Lo fol gelos ni l'alba!